Новости

«Ұстаздық еткен жалықпас, үйретуден балаға» деген ұлы Абай сөзі бар ғұмырын шәкірт тәрбиесіне арнаған ұстаз еңбегінің мәнін айқын аңғартады. Ұстаз-білім беруші ғана емес, жас ұрпақтың бойына ізгілік пен адамгершілік дәнін сеуіп, өмірлік бағыт-бағдар беретін тұлға. Осындай мәртебелі мамандықты абыроймен атқарып келе жатқан тәжірибелі педагогтердің бірі-Калиева Жанар Кенжебайқызы.

Жанар Кенжебайқызы- қазақ тілі мен әдебиеті пәнінің мұғалімі, педагог-зерттеуші. Ұстаздық қызметке 36 жылдан астам ғұмырын арнаған білікті маманның еңбек жолы ізденіске, шығармашылыққа және шәкірт жетістігіне толы.

Ол 1990 жылы Абай атындағы Еңбек Қызыл Ту орденді педагогика институтын «Қазақ тілі мен әдебиеті мұғалімі» мамандығы бойынша тәмамдап, содан бері жас ұрпаққа сапалы білім мен саналы тәрбие беруді басты мұратына айналдырып келеді.

Ұстаз еңбегінің ең үлкен жемісі-шәкірт жетістігі. Жанар Кенжебайқызының жетекшілігімен оқушылар республикалық және облыстық деңгейдегі түрлі байқаулар мен олимпиадаларда жүлделі орындарға ие болып жүр. 2021 жылы «Ұлы даланың ұлы тұлғалары» эссе байқауында шәкірті III дәрежелі дипломмен марапатталса, 2022 жылы республикалық Абай оқуларының облыстық кезеңіндегі «Ұлылар әлемі» номинациясында жүлдегер атанды.

2024 жылы республикалық «Мұқағали оқулары» байқауында шәкірті I дәрежелі диплом иеленді. «Ақбота» зияткерлік олимпиадасында да оқушылары жоғары нәтижелер көрсетіп, I және III дәрежелі дипломдарға қол жеткізді. 2025 жылы республикалық «Қадыр оқулары» байқауында шәкіртінің I дәрежелі диплом иеленуі-ұстаз еңбегінің тағы бір жарқын нәтижесі.

Жанар Кенжебайқызының кәсіби жетістіктері де мол. 2022 жылы қазақ тілі бойынша «Шамшырақ» халықаралық интернет-олимпиадасында III дәрежелі диплом иеленді. 2024 жылы қазақ тілі мен әдебиеті пәні мұғалімдеріне арналған «Тіл білгірі» халықаралық интернет-олимпиадасының жеңімпазы атанып, I дәрежелі дипломмен марапатталды. Сонымен қатар, «Педстарт» республикалық қашықтық олимпиадасында III дәрежелі дипломға ие болды.

Тәжірибелі педагог өз білімін үнемі жетілдіріп, кәсіби тәжірибесін әріптестерімен бөлісуге де ерекше мән береді. 2025 жылы «Инклюзивті білім беруді дамытудағы әлемдік тәжірибе» халықаралық ғылыми-тәжірибелік конференциясында шеберлік сағатын өткізіп, сертификат пен дипломға ие болды. Облыстық деңгейдегі іс-шараларда да өзінің іс-тәжірибесін таныстырып, кәсіби шеберлігін көрсетіп келеді.

36 жылдан астам уақыт бойы білім саласында еңбек ету-бір адамның ғана еңбек жолы емес, бірнеше буын шәкірттің өміріне қалдырған із. Жанар Кенжебайқызының әр жетістігінің артында үздіксіз ізденіс, жауапкершілік, мамандыққа деген адалдық пен шәкіртке деген сенім жатыр.

Бүгінде ол жас ұрпақтың білімді, тәрбиелі, ұлттық құндылықтарды құрметтейтін тұлға болып қалыптасуына үлес қосып қана қоймай, әріптестерімен тәжірибе бөлісіп, жас мамандарға бағыт-бағдар көрсетіп жүрген ұлағатты ұстаз.

Ұстаздың абыройы- шәкіртінің жетістігімен өлшенеді. Осы тұрғыдан алғанда, Калиева Жанар Кенжебайқызының ұстаздық жолы-білімге бастайтын өнегелі жол, ал көп жылғы еңбегі-кейінгі буынға үлгі болар тағылымды еңбек.

Ұстаз еңбегінің шырағы сөнбей, шәкірттерінің жеңісі мен құрметі еселене берсін!

Құрметпен: қазақ тілі мен әдебиеті мұғалімі Абуова Эльмира Наурызбайқызы.